काठमाडौं। वैदेशिक रोजगारीमा रहेका तथा विदेशमा स्वरोजगारमा रहेका नेपाली श्रमिकहरुको सामाजिक सुरक्षा योजना शुरुवात हुन लागेको छ ।
प्रधानमन्त्री पुष्पकमल दाहाल प्रचण्डको प्रमुख आतिथ्यतामा चैत ८ गते बुधबार राष्ट्रियसभामा उक्त योजनाको शुभारम्भ हुन लागेको हो । सामाजिक सुरक्षा कोष ऐन २०७४ बमोजिम स्थापित सामाजिक सुरक्षा कोषले वैदेशिक रोजगारीमा रहेका सबै श्रमिकहरुलाई समेत कोषमा आवद्ध गर्दै योगदानमा आधारित सामाजिक सुरक्षाको दायित्व गर्नेक्रममा योजना अगाडि ल्याइएको छ । उक्त कार्यक्रममा
गैरआवासिय नेपाली संघको तर्फबाट अध्यक्ष कुल आचार्यको विशेष मन्तव्यको साथै उनकै प्रतिनिधित्वमा गैरआवासीय नेपालीहरुको उल्लेख्य सहभागिता रहने संघले जनाएको छ ।
गैरआवासीय नेपालीहरूको प्रमुख मुद्दा मध्य एक सामाजिक सुरक्षा कोष योजना शुभारम्भ हुन लागेकोमा आफू हर्षित भएको र यो सारा गैर आवासीय नेपालीहरुको लागि खुसीको क्षण रहेको अध्यक्ष आचार्यले बताए । गैरआवासीय नेपाली संघले धेरै पहिलादेखि नै सामाजिक सुरक्षा कोषको स्थापना गर्नको निमित्त सरकारलाई पहल गरिरहेको र अहिले सार्थकता पाएकोमा सरोकारवाला सबै निकाय प्रति आचार्यले आभार प्रकट गरेका छन ।
गत साउन २० गते होटल हिमालयनमा वैदेशिक रोजगारमा रहेका श्रमिकहरुलाई कोषको दायरामा ल्याउने सम्बन्धमा सामाजिक सुरक्षा कोष र गैरआवासीय नेपाली संघ ९एनआरएनए० बीच समझदारी पत्रमा हस्ताक्षर भएको थियो ।
नेपालबाट वैदेशिक रोजगारमा रहेका लाखौ नेपालीहरु खाडी मुलुक मलेसिया, दक्षिण कोरिया ,जापान,युरोप लगायत देशहरुमा कार्यरत छन । विश्व श्रम संगठनको अभिसन्धि व्यवस्था अनुसार श्रमिकलाई सामाजिक सुरक्षा कोषमा समेट्नुपर्ने प्रावधान रहेको छ ।
समझदारीपत्र अनुसार वैदेशिक रोजगारमा रहेका श्रमिकहरुलाई सामाजिक सुरक्षा कोषमा समेट्न अध्ययन कार्यदल समिति, उपसमिति बनाउने व्यवस्था गर्ने उल्लेखित गरिएको छ । एनआरएनले वैदेशिक रोजगारमा गएका श्रमिकको सामाजिक सुरक्षाको विषयमा गरिने सभा, समारोह छलफल गोष्ठीमा कोषलाई पनि समावेश गर्ने र कोषले सो सम्बन्धमा बजारीकरण गर्ने भनिएको छ । त्यस्तै श्रमिकको योगदानको रकम कोषमा ल्याउने प्रक्रियामा सरलीकरण को लागि एनआरएनए र त्योसँग सम्बन्धित निकायद्वारा कोषलाई सहयोग पुर्याउने , वैदेशिक रोजगारमा गएका र सामाजिक कोषमा जोडिएका श्रमिकहरूको स्वदेश फिर्ता पछि उनीहरुलाई सुरक्षित र व्यवस्थित बनाउन श्रमिकहरूको ज्ञान,सीप लाई उद्यमशिलता र रोजगारीमा परिणत गर्ने र भैपरी आउने जोखिम व्यवस्थापनको लागि अध्ययन र अनुसन्धान गरी योजनाहरूको विकास गर्ने भनिएको छ। समझदारीपत्रमा दुई पक्षबीच कार्यान्वयनको शिलशिलामा द्विविधा भएको खण्डमा आपसी छलफलमा निराकरण गरिने पत्रमा उल्लेख गरिएको छ ।
उक्त पत्रमा सामाजिक सुरक्षा कोषका तर्फबाट कार्यकारी निर्देशक कपिल मणि ज्ञवाली र संघका अध्यक्ष कुल आचार्य, रविना थापा, बद्री केसी र वैदेशिक रोजगार राहत कोषका संयोजक आरके शर्माको हस्ताक्षर रहेको छ ।
एनआरएनएले धेरै पहिलेदेखी यो माग उठाऊदै आएको थियो । एनआरएनएका उपाध्यक्ष एबं हजारे अभियानका अभियन्ता डिबि क्षेत्रीले यो सहमति भएकोमा खुशी ब्यक्त गर्दै यस्ले बैदेशिक रोजगारीमा रहेका नेपालीहरुलाई धेरै राहत पुग्ने र देशलाई पनि फाइदा पुग्ने बताए ।
उक्त हस्ताक्षर पछि एनआरएनएले कतार र मलेसियामा सामाजिक सुरक्षा कोषका बारेमा जानकारी गराउन बिर्हत कार्यक्रम गर्ने तयारी गरेको छ ।
क्याटेगोरी : राजनीतिट्याग : #breaking
