काठमाडौँ । साउदी अरेबियासँग एक महिनाभित्र श्रम सम्झौता गर्ने प्रस्ताव गरिएको छ । नेपालले साउदी अरेबियासँग एक महिनाभित्रै श्रम सम्झौतालाई अन्तिम रुप दिन प्रस्ताव गरेको छ । यूएईको आबुधाबीमा भइरहेको ‘आबुधाबी डायलग’ मा सहभागी हुन पुगेका दुबै देशका अधिकारीहरुले एक महिनाभित्र श्रम सम्झौतामा हस्ताक्षर गर्ने वातावरण बनाउने प्रस्ताव गरिएको हो ।
नेपालको तर्फबाट श्रम, रोजगार तथा सामाजिक सुरक्षामन्त्री शरतसिंह भण्डारीको नेतृत्वमा गएको नेपाली टोली र साउदीका श्रम अधिकारीहरुबीचको साइडलाइन बैठकमा नेपालले उक्त प्रस्ताव गरेको हो । विगत ८ वर्षदेखि साउदीसँग श्रम समझदारी गर्ने प्रयास भइरहेको छ । तर, सफल हुन सकेको छैन । साउदीले श्रमिकको हितको विषयमा नेपालले गरेका थुप्रै प्रस्ताव स्वीकार नगर्दा सहमति जुट्न नसकेको श्रम मन्त्रालयले जनाएको छ ।
आइतबारको बैठकमा नेपाली पक्षले सम्झौतामा ‘स्वच्छ भर्ना प्रणाली’, सामाजिक सुरक्षा, बीमा, पेशागत स्वास्थ्य सुरक्षा लगायतका विषयमा छलफल गर्न आग्रह गरेको थियो । साउदीले घरेलु श्रमिकको लागि पनि छुट्टै श्रम समझदारी गर्नुपर्ने अडान लिँदा श्रम समझदारी हुन सकेको थिएन । श्रम मन्त्रालयका प्रवक्ता राजिव पोखरेलले साइडलाइन बैठकमा साउदीबाट सीपमूलक जनशक्ति उत्पादन निम्ति तालिम केन्द्र स्थापना गर्न हालसालै प्राप्त सहयोगलाई निरन्तरता दिने विषय छलफल भएको बताए । त्यस्तै भाषा र सीप जानेका श्रमिक उत्पादनमा सहकार्य गर्नेबारे समेत छलफल भएको उनको भनाइ छ ।
कफाला प्रणाली एवं विभिन्न कारणले मृत्यु भएका श्रमिकको डेथ बडी छिट्टै नेपालसम्म पठाउन सक्नेगरी सहजीकरण एवं सप्लाई कम्पनीमा गएर काम नपाउने अवस्थाको निरुत्साहित गर्ने विषयमा समेत छलफल भएको थियो । खाडी मुलुकको निजी क्षेत्रहरुबाट दक्ष जनशक्तिको माग बढ्दै गएको हुँदा सीपयुक्त जनशक्ति विकासको लागि लेबर रिसिभिङ कन्ट्री लेबर सेण्डिङ कन्ट्रीबीच सहकार्य गर्ने विषयमा समेत छलफल भएको थियो ।
कतारका अमिरको नेपाल भ्रमणका क्रममा श्रम समझदारीपत्रमा हस्ताक्षर गर्ने प्रस्ताव
कतारका अमिरको नेपाल भ्रमणका क्रममा श्रम समझदारीपत्रमा हस्ताक्षर गर्ने प्रस्ताव गरिएको छ । यूएईको आबुधाबीमा भइरहेको ‘आबुधाबी डायलग’ मा सहभागी भएका दुवै देशका श्रम अधिकारीहरुबिचको साइडलाइन मिटिङमा कतारी अमिरको नेपाल भ्रमणका क्रममा श्रम समझदारीमा हस्ताक्षर गर्ने गरी तयारी गर्न सहमत भएका हुन् । कतारसँग सन् २००३ मा द्विपक्षीय श्रम सम्झौता भएको थियो । उक्त सम्झौतालाई आवश्यक संशोधनका लागि दुवै देशका अधिकारी सक्रिय छन् । कतारी राजाको नेपाल भ्रमणको क्रम सम्झौतामा हस्ताक्षर गर्ने गरी तयारी थालिएको हो ।
उक्त दुई पक्षीय बैठकमा सीप साझेदारी श्रमिकहरुको हक हित सुरक्षाका विषयवस्तु थप गर्ने दुवै देशले अनलाइन कन्सल्टेशन गरी चाडै टुङ्ग्याउने विषयमा सहमत भएका छन् ।
कतार पक्षबाट घरेलु कामदारका निम्ति पर्याप्त सुरक्षाका व्यवस्थाहरु गरिएको हुँदा भाषा र सीप सिकाएर सम्मानित रुपमा मात्र पठाउन तालिम प्रदान गर्न कार्यमा सहकार्य गर्ने प्रस्ताव गरिएको थियो । कतार समेत घरेलु कामदार माग गर्दै आएको छ । घरेलु कामदारको लागि आवश्यक पर्ने सेवा, सुविधा, सामाजिक सुरक्षा तथा आवश्यक सुरक्षा प्रवर्द्धन कतार सरकारले मिलाउने बताउँदै आएको छ । त्यसका लागि नेपालमा नै सीप सिकाउने र सीप सिकिसकेपछि मात्रै कतारमा घरेलु कामदारको रुपमा पठाउन सकिनेगरी आवश्यक व्यवस्था गर्न कतार रहेको बताउँदै आएको छ ।
क्याटेगोरी : ग्लोबल, गल्फट्याग : #breaking,
#hot
